Do CD Sons da Terra, editado polo Arquivo Sonoro de Galicia, extraemos o canto dun carro subindo en Saramugo (Vilalba), un documento sonoro único e irrepetíbel.
Os cincuenta sons da terra que figuran nese disco forman parte das cento vintesete gravacións que os técnicos de son Jesús Villares e Roberto Díaz efectuaron como parte integrante do seu proxecto fin de carreira, presentado na Escola de Imaxe e Son da Coruña en xuño de 1993. Para realizaren esta ampla escolma de sons característicos da Galiza tradicional, natural e humana, contaron cos medios técnicos da Escola e percorreron os camiños de Arteixo, Camariñas, Cambre, Fisterra, Malpica, San Sadurniño e Oleiros na Coruña e as terras de Abadín, O Corgo, O Valadouro e Vilalba en Lugo. Posteriormente, Michel Canadá realizou a selección e montaxe dos sons escolmados nos estudos do Laboratorio de Creación Sonora da Coruña.
